ಸಾಫ್ಟವೇರ್ ಲೈಫು

ಹಳೆ ಬೇರನು ತೊರೆದು

ಹೊಸ ಬಂಧಕ್ಕೆ ಬೆಸೆದು

ಹಲವು ಮೈಲಿಯ ಕಳೆದು

ಸಾಧನೆಯ ಕದವ ತಟ್ಟಿ

ಬಣ್ಣಬಣ್ಣದ ಕನಸ ಕಟ್ಟಿ

ಸೇರಿದ್ದು ವರ್ಣ ರಹಿತ ಬದುಕಿಗೆ

ಎಲ್ಲವೂ ಕೃತಕ, ಎಲ್ಲೆಲ್ಲೂ ಕಾಂಕ್ರೀಟು

ಗಂಧದ ಘಮ, ಶ್ರೀಗಂಧಕ್ಕೆ ಸೇರಿಲ್ಲ

ಚೆಂದದ ಸುಮ, ಸುಗಂಧವ ಬೀರುತ್ತಿಲ್ಲ.

ಹಳೆ ಬೇರು ಮತ್ತೆ ಸೆಳೆಯುತ್ತಿದೆ,

ಹೊಸ ಬಂಧ ಉಸಿರು ಕಟ್ಟುತ್ತಿದೆ.

ಎಲ್ಲಾ ಬಂಧ- ಭಾವವ ಕಳಚಿ,

ಮಾಂಸ ಹೊದಿಕೆಯ ಮಡಚಿ,

ತಾಯ ಉದರದಲ್ಲಿ ಮಗುವಾಗಿ

ಮತ್ತೆ ಮೆತ್ತಗೆ ಮಲಗಿ,

ಹೊಸ ದಾರಿ, ಹೊಸ ಕನಸ

ರಂಗೋಲಿ ಬಿಡಿಸುವಾಸೆ.