ಹೇಳಲಾರೆ ಕಾರಣ

“ಹೇಳಿ ಹೋಗು ಕಾರಣ, ದೂರ ಹೋಗುವ ಮೊದಲು” ಎಂದ ನಿನಗೆ, ನನ್ನ ಪ್ರೀತಿಪೂರ್ವಕ ಉತ್ತರ.

ಏನ ಹೇಳಲಿ ಕಾರಣ,

ನಿನ್ನ ತೊರೆದ ಈ ಮನ.

ಹಲವು ಕಾರಣಗಳಿತ್ತು,

ಇರಲು ನಿನ್ನೊಂದಿಗೆ ಬೆರೆತು.

ಪದೇ ಪದೇ ಹುಡುಕಿ ಸೋತೆ,

ನಮ್ಮೊಳಗಿನ ಕೊರತೆ.

ಸಿಕ್ಕಿದ್ದು, ಬರೀ ಪ್ರೀತಿಯ ಕಂತೆ ಕಂತೆ.

ಚಿಂತೆ ಮರೆಸಿ, ಪ್ರೀತಿ ಬೆರೆಸಿ,

ಬೆಳೆಸಿದ್ದ ಸಸಿ,

ಸಣ್ಣ ಸಣ್ಣ ವಿರಸದಿಂದ,

ಮನದ ಮಾತಿನಂತರಗಳಿಂದ,

ಮೊಗ್ಗು ಬಿರಿವ ಮೊದಲು,

ಕುಗ್ಗಿ ಬಾಡಿತು ಒಲವು.

ಮರಿಚಿಕೆಯಾಯ್ತು ಪ್ರೀತಿಯಂಬಾರಿಯ ಚೆಲುವು.

ಬತ್ತಿರುವ ದೀಪ, ಮುರಿದಿರುವ ಕೊಳಲು.

ಹೇಗೆ ಹೆಣೆಯಲಿ ಹಸಿ ನೋವ ಅಳಲು.

ಕವಿದ ಕತ್ತಲ ಕರಗಿಸಲಾರೆ,

ಸಂತಸದ ಸಂಗೀತಕ್ಕೆ ಶೃುತಿ ಸೇರಿಸಲಾರೆ.

ಮತ್ತೆ ಮತ್ತೆ ಕೆದಕಬೇಡ,

ಈ ಅಗಲಿಕೆಯ ಕಾರಣದ ಗೂಡ.

ಸಾಗು ನೀ ಹಿಡಿದು, ಹೊಸ ಬದುಕ ಜಾಡ.

ಸಿಗುವೆ ಮುಂದೆಂದಾದರೂ ಈ ಬಾಳ ಬಂಡಿಯಲಿ,

ಸಿಕ್ಕಾಗ ನಿನ್ನ ಮೊಗದಿ ನನಗೊಂದು ನಗುವಿರಲಿ.