ಜೋಳಿಗೆಯ ಜೋಗುಳ

ಜಗವ ಸುತ್ತಿಸುವಳು ಜನನಿ

ಜೋಳಿಗೆಯ ಜೋಲಿಯಲ್ಲಿ.

ಜನಜಂಗುಳಿಯ ಜಂಕೆಯೇ

ಜೋಗುಳದ ಹಾಡು ಇಲ್ಲಿ.

ಪಲ್ಲಕ್ಕಿ-ಪಲ್ಲಂಗಕ್ಕೂ ಮಿಗಿಲು ಈ ನನ್ನ ತೊಟ್ಟಿಲು;

ತೂಗುಯ್ಯಾಲೆಯ ಸಂಚಾರದಲೆ ಗತ್ತು-ಗಮ್ಮತ್ತು.

ಬತ್ತಿರುವ ಎದೆಯಲ್ಲೂ ಒಸರುವ

ಎದೆಹಾಲಿನಮೃತದ ಸವಿ ನನ್ನದೇ ಸ್ವತ್ತು.

ಇಣುಕಿಣುಕಿ ಜೋಳಿಗೆಯ ಕಿಟಕಿಯಲಿ

ನುಸುಳುವ ರವಿಮಾಮನ ಕಚಗುಳಿ.

ಧಗೆತಾಗದಂತೆ, ಸೆಕೆಯಾರಿಸಲೆಂದೇ

ಮತ್ತೆ ಮತ್ತೆ ಮುತ್ತಿಕ್ಕುವ ಸಿಹಿಗಾಳಿ.

ರಾಜಯೋಗವ ಮೀರಿಸುವ ಯೋಗವಿದು;

ಹಸಿದೊಡನೆ ಹಾಲು, ಬಯಸಿದಾಗೆಲ್ಲ ಮಡಿಲು.

ಮರೆಸಿಹುದು ಮಾಸಿದ ಜೋಳಿಗೆಯ ಘಮವ;

ಮೆರವಣಿಗೆಯಲಿ ತಾಯಿ ನಿನ್ನುಸಿರ ನೆರಳಿರಲು.

ಬದುಕಿನ ಬಂಡಿ ನಡೆಸಲು ಬೀದಿಬೀದಿಯಲ್ಲಿ ತಾಯಿ ತನ್ನ ಮಗುವನ್ನು ಜೋಳಿಗೆಯಲ್ಲಿ ಹೊತ್ತು ತಿರುಗುವಾಗ, ಜೋಳಿಗೆಯೊಳಗೆ ಮಗುವಿನ ಅನುಭವ ಹೀಗಿರಬಹುದೇ ???